2,731 total views
Ikinalugod ng mga Pilipino sa Italya ang pagdalaw ng mga opisyal ng simbahan sa Pilipinas sa kanilang komunidad.
Ayon kay Pontificio Collegio Filippino Rector Fr. Gregory Ramon Gaston, nagdiwang ng banal na Misa sa Sentro Filippino Chaplaincy sa Roma noong October 8 sina CBCP President, Kalookan Bishop Pablo Virgilio David at CBCP Vice President, Pasig Bishop Mylo Hubert Vergara.
Sinabi ni Fr. Gaston na siya ring National Coordinator of Filipino Chaplains in Italy na makabuluhan ang pagdalaw ng mga obispo sapagkat ipinakikita nito ang pakikiisa at pagmamalasakit sa mga Pilipinong mananampalataya sa iba’t ibang bahagi ng daigdig.
“Their celebrations show the closeness of the Church to our Filipino migrants all over the world,” pahayag ni Fr. Gaston sa Radio Veritas.
Kinilala ng pari ang tungkulin ng mga migrante sa pagpapalago ng pananampalatayang kristiyano bilang mga misyonero sa mga komunidad na kanilang kinabibilangan.
“Much has already been achieved, in that our OFW’s have been helping give life to the Church wherever they are; though this is still a work in progress, and much can still be done,” ani Fr. Gaston.
Kasalukuyang pinamunuan ni Scalabrinian missionary Fr. Ronan Ayag ang Sentro Filippino Chaplaincy na nangangalaga sa Filipino migrants sa Roma.
Samantala tiniyak din ni Bishop David na tutulungan ang komunidad sa pakikipag-ugnayan sa Italian Bishop Conference para sa natatanging programa ng chaplaincy na makatutulong mapalago ang samahan ng Filipino-Italians.
Ito rin ay bunsod sa suliraning ibinahagi ni Ryan Asinas ang pangulo ng Sentro Filippino Pastoral Council sa paglunsad ng Youth Camp para sa Filipino-Italian youths na layuning maipakilala ang kulturang Pilipino lalo’t magkakaiba ang tradisyon at kultura sa Italya gayundin upang mabuksan ang kamalayan ng kabataan sa kanilang tungkulin sa simbahang katolika.
Kasalukuyang nasa Roma sina Bishop David kasama sina Bishop Vergara, Manila Archbishop Jose Cardinal Advincula at Dr. Estella Padilla para sa 16th Ordinary Assembly of the Synod of Bishops na magtatapos sa October 29.
