653 total views
Dismayado ang isang opisyal ng Catholic Bishops’ Conference of the Philippines (CBCP) kaugnay sa mga kaso ng mga bagong silang na sanggol na basta iniiwan na lamang sa iba’t ibang mga lugar.
Ayon kay San Carlos Bishop Gerardo Alminaza – vice chairman ng CBCP-Episcopal Commission on Social Action, Justice and Peace bagamat hindi maaaring basta husgahan ang mga ina ng mga naturang sanggol ay labis namang nakababahala ang basta pag-iwan at pagpapabaya sa mga bagong silang na sanggol na walang kamalay-malay.
Paliwanag ng Obispo, nakalulungkot ang naturang mga pangyayari na maaaring sumasalamin sa uri ng lipunang umiiral sa bansa sa kasalukuyang panahon.
Iginit ni Bishop Alminza, napananahon na upang muling suriin ng bawat isa ang ating kultura, budhi, paraan ng pamumuhay at sistema ng pagpapahalaga na dapat ay nakabatay sa kung ano ang tama at mabuti.
“While we can’t judge the mothers concerned without knowing their back story, yet such actions are deplorable and reflective of the kind of society we have become! Such stories should challenge us to examine our conscience, our culture, lifestyle, and value system…. What have we become? Why?” Bahagi ng pahayag ni Bishop Alminaza.
Unang iginiit ng Pro-life Philippines na hindi sex education ang sagot sa patuloy na suliranin ng teenage pregnacies sa bansa sa halip ay ang pagpapatatag ng values, moralidad at samahan ng pamilyang Pilipino na nagsisilbing unang batayan sa konsepto ng pag-ibig at pagmamahal ng bawat indibidwal lalo’t higit ng mga kabataan.
Paliwanag pro-life group, kung maaagang mamumulat ang mga kabataan sa tunay na diwa ng pag-ibig na pagsasakripisyo at paggalang sa taong minamahal ay hindi na kakailanganin pang gabayan ang mga kabataan kaugnay sa konsepto ng pagpapahayag ng pag-ibig sa makamundong pamamaraan.
Kaugnay nito batay sa tala ng Philippine Statistics Authority (PSA) noong 2022 umabot sa 150,138 ang bilang ng mga sanggol na ipinanganak ng mga adolescent mothers o katumbas ng 10% mula sa kabuuang registered births sa nasabing taon.
