321 total views
Nanawagan si Under Secretary for Staff Bureau . Demetrio Ignacio sa mamamayan lalo na sa mga turista na pangalagaan ang kalikasan.
Ipinaliwanag ni Usec. Ignacio na mahalagang magkaroon ng kaalaman ang mga turista kaugnay sa tamang pangangalaga sa mga lugar na kanilang bibisitahin ngayong summer.
Aniya, dapat madisiplina ang mga turista upang maiwasan ang labis na pagkakalat, lalo na ang pagtatapon ng mga plastic sa karagatan.
Dagdag pa nito mahalaga ring maging maingat at mapagmatyag ang mga lokal na pamahalaan sa pagbabantay sa mga likas na yaman ng kanilang karagatan tulad ng mga coral reefs na inaabot ng libong taon bago muling mabuo kapag nasira.
“Kapag nasira ang isang coral reef it takes thousands of years para tumubo yan, kaya kami po, nakikipagtulungan kami sa Department of Tourism saka lalong lalo na sa lokal na pamahalaan, sila po kasi yung nasa lugar, sila yung puwedeng makakita niyan, sila yung puwedeng magbantay huwag nilang pabayaan at i-educate natin yung mga turista natin”.pahayag ni Ignacio sa programang Barangay Simbayanan.
Samantala, nagpaalala rin ito sa mga mahilig mag-hiking na huwag mag-iwan ng mga kalat sa kabundukan, at huwag gumawa ng mga gawaing makasisira sa kalikasan.
Hiniling din ni Ignacio sa bawat isa na magtipid,huwag magkalat at magtanim ng mga puno.
Nauna rito, nanawagan si CBCP-Episcopal Commission on the Laity chairman Manila Auxiliary Bishop Broderick Pabillo sa mga magbabakasyon na maging eco-friendly.
Read: http://www.veritas846.ph/summer-vacations-gawing-eco-friendly/
Matatandaang ito rin ang panawagan ng Kanyang Kabanalan Francisco sa encyclical na Laudato Si, upang maisalba ang daigdig na natatanging tahanang nilikha ng Panginoon para sa bawat nilalang.
