202 total views
Nagpaabot ng panalangin ang Pontificio Collegio Filipino sa Roma, para sa mamamayan ng Marawi na naiipit
sa gitna ng kaguluhang dulot ng mga teroristang grupo.
Ayon kay Rev. Fr. Greg Gaston – Rector ng paaralan, nag-alay ng Banal na Misa ang mga Filipinong Pari sa Roma sa pangunguna ni Caritas Internationalis President, Manila Archbishop Luis Antonio Cardinal Tagle, para sa kaligtasan ng mga bihag ng Maute group, kabilang na si Fr. Chito Suganob.
“Pinagdadasal namin at kaninang umaga din dito [oras sa Roma] nag-misa dito si Cardinal Chito Tagle at sabi niya nga, ayan si Father Chito at ngayon din ay fiesta [sa Marawi] at nakakaantig kung iisipin natin mga [inosente] dun wala namang ginagawa, nagdadasal pa nga,” pahayag ni Fr. Gaston sa Radyo Veritas.
Pagbabahagi pa ng Pari, makailang ulit na binigyang diin ng Kanyang Kabanalan Francisco na ang pagkakaiba-iba ng relihiyon at paniniwala ay hindi dapat maging banta sa kaligtasan ng bawat tao, dahil ang iisang Diyos na minamahal at sinasamba natin ay hindi nanaising pumatay.
“Yung pagtingin sa relihiyon, ito’y pinaulit ulit ni Pope Francis na yung relihiyon ay hindi yan dapat magdala sa atin sa pagpatay sa ating kapwa kasi ang Diyos naman hindi gustong pumatay ng mga tao, hindi naman ibig sabihin na iba ang pag-unawa natin sa Panginoon, magpapatayan na tayo,” dagdag pa ng Pari.
Iginiit ng Pari na ang pananalig sa Panginoon ang dapat magdala ng kapayapaan at pagkakaunawaan sa pagitan ng magkakaibang pananampalataya.
Batay sa pagsusuri ng Global Terrorism Index noong 2013, pang-siyam ang Pilipinas sa mga bansang lubhang naaapektuhan ng terorismo.
