225 total views
Dalawa sa Radio Veritas anchor priest ang nominado sa gaganaping Catholic Social Media Award sa Sienna College Quezon City sa November 18.
Sina Fr. Luciano Felloni ng Barangay Simbayanan sa kaniyang ‘Almusalita’ ay nominado bilang ‘Male Social Media of the Year’ at si Fr. Jade Licuanan ng programang Pamilya Mo, Pamilya Ko para sa kanyang Catechism on the Go sa kategorya ng ‘Best Catholic Vlog’.
Nagpapasalamat din sina Fr. Felloni at Fr. Licuanan na maging nominado sa CSM awards na isang paraan para maghayag ng mabuting balita ng Panginoon sa pamamagitan ng social media.
‘‘Yan ang trabaho namin na to make Jesus a voice in social media. So nagpapasalamat ako na somehow ina-appreciate ‘yung effort na ginagawa namin. Lagi kong sinasabi ko naming, kasi I have a team at my back. I’m their face, but there is a team of young people ‘millennials’ working for this,’’ ayon kay Fr. Felloni.
Sinabi naman ni Fr. Licuanan; ”We go wherever our flock is. And we will adjust as a church, defending on the situation or circumstances that they are in right now. But the good thing about it as a church we will always hold on to the teachings of the Lord that has always been here with us for more than 2,000 years. We will have the same message, we will just package it… kung saan ang mas na-a-attract ang bagong henerasyon.”
Sa Sabado November 18, gagawaran ng pagkilala ang mga mapipiling mananalo alas-7 ng gabi na gaganapin sa Siena College Quezon City.
Bago ang paggawad ng parangal sa mga nagwagi, idaraos din ang Catholic Social Media Summit v6 na ang tema ngayong taon ay ‘‘Inspire, Dispelling the Darkness in Social Media” simula alas-8 ng umaga kung saan pangunahing speaker si Caloocan Bishop Pablo Virgilio David.
Ito na ang ika-anim na taon ng pagdiriwang summit na ang layunin ay patuloy na i-update ang mga Catholic Media sa daloy ng impormasyon na magagamit sa paghahayag ng mabuting balita at adbokasiya ng simbahan.
Una na rin kinikilala ng simbahan bilang biyaya ang paggamit ng makabagong teknolohiya tulad ng internet at paggamit ng social media bilang platform para sa paghahayag ng ebanghelisasyon.
Sa pag-aaral ng We are Social Ltd, ang Pilipinas ang nangunguna sa paggamit ng social media tulad ng Facebook, Twitter, Instagram na karaniwang naggugugol ng higit sa apat na oras kada araw.
