143 total views
Nakauwi na ang mga 76 na magsasakang lumahok sa kilos–protestang nauwi sa madugong dispersal sa Kidapawan City, North Cotabato noong April 1 matapos na makapag–piyansa.
Ayon kay Diocese of Kidapawan Apostolic Administrator Msgr. Lito Garcia, mapayapang nakauwi ang mga magsasaka matapos na matulungan ng ilang mga concerned groups at dalawa na lamang ang hindi pa nakauuwi na sinasabing nawawala.
Inihayag ni Msgr.Garcia na namalagi ng ilang araw ang 76-magsasaka sa organic farm ng Diocese of Kidapawan dahil sa takot sa kanilang seguridad at kaligtasan.
“Yes, 76 na yung nakauwi na naka – bail meron nalang na 2 na naiwan. Kasi na – bail ng half million meron concerned group na nagbayad ng bail kaya nakauwi na sila. Dalawa na lang yata yung hindi pa pinalabas. Sa ngayon yung attorney ang humaharap pa naka-bail na makaka – uwi sila yung ilan na naiwan meron namang nag – aasikaso dun,” pahayag ni Msgr. Garcia sa panayam ng Veritas Patrol
Sinabi ni Msgr.Garcia na sa tulong ng PAO o Public Attorney’s Office ay napawi ang pangamba ng mga magsasaka na uwuwi.
Kinumpirma naman ni Msgr. Garcia na kikailangan pa rin ng legal assistance at pagkain ng mga Kidapawan farmers.
Inihayag ni Msgr.Garcia na naipamahagi na rin ang 200 sakong bigas mula sa Caritas Manila kung saan tumanggap ng 18 sako ng bigas ang 15 parokya ng Diocese of Kidapawan.