181 total views
Mga Kapanalig, habang papalapit ang halalan, asahan nating mas titindi na ang pangangampanya ng mga nais makuha ang boto ng mahigit 67 milyong Pilipinong registered voters. Hindi imposibleng maging sa ating mga pamilya ay may pagkakaiba-iba ng opinyon at pananaw sa mga kumakandidato. Kahit sa trabaho at sa komunidad, tiyak na mainit na usapin ang pulitika at may kanya-kanyang manok ang bawat isa. May mga pagkakataong ang ganitong mga pagkakaiba-iba ang nagiging mitsa ng hindi pagkakaunawaan ng mga magkakapamilya, magkakatrabaho, magkakaibigan, o magkakapitbahay.
May paraan ba upang maiwasang mauwi sa hindi magandang ugnayan ang pagtutunggali ng ating mga opinyon at pinaniniwalaan, partikular na sa usaping pulitika?
Sa kanyang mensahe para sa ika-55 na World Day of Peace na ipinagdiriwang natin sa Simbahan tuwing unang araw ng taon, sinabi ni Pope Francis na isa sa mahahalagang saligan ng kapayapaan ay ang diyalogo sa pagitan ng mga henerasyon—dialogue between generations, sa Ingles. Inilagay ng Santo Papa sa mas malawak na konteksto ng kasalukuyang pandemya ang kanyang paliwanag tungkol dito, ngunit maaari din natin itong ilapat sa kawalan ng kapayapaang bunga ang magkakasalungat na pananaw sa pulitika.
Sabi ni Pope Francis, ang mga mas matandang henerasyon ay tila ba lugmok sa kalungkutan, habang ang mga mas batang henerasyon ay tila ba walang lakas na harapin ang kinabukasang naghihintay sa kanila. Ito ang magkaibang pinanggagalingan ng dalawang henerasyong binanggit ni Pope Francis, at ito rin ang masasabi nating pinagmumulan ng madalas na hindi pagsasalubong, ‘ika nga, ng mga nakatatanda at kabataan kapag pulitika na ang pinag-uusapan.
Diyalogo ang nakikitang susi ng Santo Papa upang magkasalubong ang dalawang henerasyong ito. Kaakibat ng pakikipagdiyalogo ang pakikinig sa isa’t isa, ang pagbabahagi ng mga pananaw kahit pa magkakaiba ang mga ito, ang pakikipagkasundo, at paghakbang nang magkasama. Ang tunay na diyalogo, kasama ang pagpapalitan ng tama at positibong mga pananaw, ay nangangailangan ng tiwala sa pagitan ng mga kalahok. Kailangan nating matutunang makuha ang tiwala ng isa’t isa. Bawat isa ay dapat magbigay ng puwang sa kanilang mga kinakausap at iwasang magmatigas na ang kanyang pananaw lamang ang tama at dapat masunod. Ang ganitong ugnayan at diyalogo, dagdag ni Pope Francis, ay ang dapat nagbibigay-buhay sa isang malusog na pulitika.
Dito sa ating bansa, napakatingkad ng pagkakahati-hati natin pagdating sa pulitika, at sa halip na burahin ito, mukhang mas gusto ng maraming gatungan ito. Ginagawa nila ito sa pamamagitan ng paninira sa isa’t isa, ang bansagan ang mga hindi nila kasundo ng masasakit na tawag. Sa halip na makinig sa pagtatamang ginagawa ng kanilang mga hindi kasundo kapag may ibinabahagi silang batay sa maling impormasyon, sasagutin nila sila gamit ang bastos na mga salita. Tinutuldukan na nila ang anumang kagustuhang magkaroon ng mapagkakasunduang usapan.
May mga matatandang hindi bukas na pakinggan ang mga pananaw ng kabataan; may mga mas bata namang hindi na interesadong makinig sa pangaral ng mga nauna sa kanila. May mga matatandang ang gusto ay sila lamang ang masusunod kahit na mali ang kanilang katwiran; may mga mas bata namang iginigiit na malaya silang paniwalaan ang gusto nila kahit pa mapanganib ito. Totoong mahirap ang pakikipagdiyalogo ngunit hindi natin ito dapat sukuan kung nais natin ng tunay na kapayapaan sa loob ng ating tahanan at sa lipunang ating ginagawalan.
Mga Kapanalig, tanong nga sa Amos 3:3, “Maaari bang magsama sa paglalakbay ang dalawang taong hindi nagkakasundo?” Ngayong halalan, sikapin nating magkasundo sa ating mga hangarin para sa ating bayan, at kung lilinaw ito sa pamamagitan ng diyalogo, lilinaw din kung sinu-sino ang dapat nating iboto para sa kapakanan ng lahat ng henerasyon.