1,614 total views
Nalagpasan ng Bureau of Customs (BOC) ang target na makolekta sa unang bahagi ng 2023.
Sa ulat, may P213.619 bilyon ang nakolektang buwis ng ahensya mula Enero hanggang Marso o higit sa P16.6 bilyon o 8.43 porsyento sa itinakdang P197 bilyon.
Sa buwan ng Marso ay nakakolekta ang BOC ng P80.133 bilyon na lagpas ng 10.86 porsyento sa target na P72.282 bilyon.
Iniugnay ni Customs Commissioner Bienvenido Y. Rubio ang magandang performance ng kanyang ahensya sa 5-point priority programs ng BOC na nakatuon sa digitalization ng mga proseso ng Customs, pagpapadali ng mga proseso, pagsugpo sa smuggling, at pagbibigay halaga sa kapakanan at pag-unlad ng mga empleyado.
“Our positive collection performance for the first quarter of 2023 is a testament to the hard work and dedication of our men and women at the Bureau. We will continue to implement our priority programs and introduce new initiatives to sustain this positive momentum.” ayon kay Rubio.
Ang nakolekta ng BOC sa unang bahagi ng taon ay mas malaki ng 13.29 porsyento kumpara sa nakolekta sa kaparehong panahon noong 2022 na umabot sa P188.557 bilyon.
“We will continue to work hard and strive for excellence as we aim to become one of the world’s best Customs administrations.” sabi pa ni Rubio.
Nagpasalamat rin si Rubio sa mga kawani ng ahensya sa pagsusumikap na gampanan ang kanilang tungkulin.
