356 total views
Patuloy na nagiging aktibo ang Caritas Novaliches sa pagsasagawa ng mga pagkilos upang makatulong sa mga mahihirap ngayon panahon ng pandemya.
Ito ang ginarantiya ni Rev. Fr. Joseh Buslon, Director ng Caritas Novaliches kaugnay sa kanilang agresibong pagsisikap na makapaghatid ng ayuda sa mga mamamayan sa nasasakupan ng kanilang diyosesis.
Ayon kay Fr. Buslon, ngayon mas higit na kailangan ng mahihirap ang bawat isa partikular na ng tulong mula sa Simbahan kaya’t hindi tumitigil ang kanilang tanggapan sa pamamahagi ng tulong katuwang ang iba pang organisasyon ng Simbahang katolika at mga pribadong sektor.
“Mahalaga ang mga tulong na ipinararating at inihahatid ng Simbahan sa mga kapatid nating kapos at naghihikahos sapagkat mula sa mga tulong na iyon ay naka susumpong sila ng liwanag at pag-asa na hatid ni Kristo at tayo bilang kapwa ang kanyang instrumento.” Mensahe ni Fr. Buslon sa Radyo Veritas.
Umaasa si Fr. Buslon na ang kanilang mga pagkilos ay magsisilbi din inspirasyon para sa mga nakakaranas ng krisis at magsisilbi naman itong oportunidad para sa iba upang makatulong.
“You can give without loving, but you cannot love without giving. “Magmahal ng lubos, magbigay ng taos, maglingkod ng hindi kapos, ibahagi ang sarili kahit lakas ay maubos ang Diyos na ang bahala sa lahat pagkatapos.” Dagdag pa ni Fr. Buslon.
Kaugnay nito, isang online telethon ang isasagawa ng Diocese of Novaliches sa ika-21 ng Agosto mula ika-pito ng umaga hanggang ika-7 ng gabi.
Layunin ng nasabing telethon na makalikom ng pondo para ibahagi sa mga mahihirap na lalong naapektuhan ng pandemya ang kanilang mga pamumuhay.
Ilan sa mga inaasahang makikibahagi sa “Online Telethon” ng Diocese of Novaliches ay sina Manila Archbishop Emeritus at Caritas Internationalis President Luis Antonio Cardinal Tagle, Bro. Bo Sanchez at Rev. Fr. Jerry Orbos SVD kasama ang iba pang mga kaparian sa Diyosesis at mga lingkod ng Simbahan.
Tinatayang nasa 33 Parokya na sa Diyosesis ang nahatiran ng may 700 sako ng bigas ng Caritas Novaliches maliban pa sa patuloy na pamimigay ng mga food packs, gulay, at mga gift certificates.