211 total views
Dapat ng suriin ng Department of Health (DOH) ang kanilang panuntunan para masupil ang mga nakakahawa at nakakamatay na sakit, tulad ng human immunodeficiency virus o HIV.
Ito ang hamon ni Fr. Dan Cansino, executive secretary ng Catholic Bishops’ Conference of the Philippines
(CBCP)-Episcopal Commission on Health Care sa D-O-H bunsod ng patuloy na pagtaas ng bilang ng may HIV
sa bansa.
Iginiit ni Father Cansino na malaking pondo na ang nagamit ng pamahalaan kaugnay sa pagpapatupad ng Reproductive Health law kabilang na ang pamamahagi ng mga condom subalit patuloy pa rin ang pagtaas ng bilang ng HIV.
“Sana mapatupad yung behavior change, sa totoong pagpapahalaga ng values natin. Hangga’t hindi natin yun binibigyan ng pansin, pinapalamanan natin ang lahat ng ating mga strategies, values mula sa kabataan, young adults, out-of-school youths and even yung mga nasa eskwelahan mawawala ang halaga ng ating strategy.
Tataas at tataas talaga pa rin ang ating kaso“ pahayag ni Fr. Cansino sa Radio Veritas.
Base sa ulat ng DOH sa buwan ng Abril, 629 katao ang nagkaroon ng HIV.
Walumpung porsiyento sa mga may HIV o 513 ay pawang nasa edad 15 hanggang 34 o ang sinasabing edad ng mga millennials.
Kalahati rin ng nasabing bilang ay nahawa dulot ng pakikipagtalik sa kapwa lalaki.
Unang naglaan ang DOH ng 1-bilyong pisong pondo para sa HIV-AIDs awareness campaign kung saan kabilang sa plano ang libreng pamamahagi ng condom sa mga paaralan na tahasan namang tinutulan ng Simbahang Katolika.
Patuloy na iginigiit ng CBCP na sa halip na pamamahagi ng ‘condom’ ay dapat na bigyan ng kaalaman ang mga mag-aaral hinggil sa kahalagahan ng katawan ng isang tao at ang posibleng panganib na dulot ng maagang edad na pakikipagtalik, at pakikipagtalik sa hindi asawa.
