18,556 total views
Muling tiniyak ng pamayanan ng St. Joseph the Worker Parish sa Pandayan Meycauayan Bulacan ang pagpapaigting sa ebanghelisasyon hango sa mga tagpo ng bibliya.
Ito ang binigyang diin ni Fr. Ibarra Mercado, ang kura paroko ng parokya sa taunang Christmas Carroza na kanyang inilunsad sampung taon ang nakalilipas.
Ayon sa pari binibigyang pansin sa gawain ang buhay ni Hesus na inialay ng Diyos Ama sa sanlibutan upang matubos ang kasalanan ng sangkatauhan.
“Itong Christmas Carroza ay aming mabisang pamamaraan para kami ay tumutugon sa panawagan ng evangelization. Nagtuturo po tayo ng katesismo, mga elemento po ng ating pananampalataya lalong lalo na po ang pagsilang at pagkabuhay ng ating Panginoong Hesukristo,” pahayag ni Fr. Mercado sa Radio Veritas.
Tampok sa unang dekada ng christmas carroza ang pagbibigay kabuluhan sa mga kristiyanong katuruan na dapat isaalang-alang ng bawat binyagan.
Tampok ngayong taon sa walong carroza ang tungkuling ginampanan ni San Juan Bautista sa buhay ni Hesus (The Cardinal Academy Inc.); Pag-iisang dibdib ni San Jose at Birheng Maria (Commission on Youth, Ministry on Altar Servers at Commission on Social Communications); Ang kapanganakan ni Hesus (St. Anne Academy of Meycauayan); La Virgen Dela Leche (Commission on Evangelization, PASKA, El Shaddai, Pondo ng Pinoy, Bible Apostolate, Bukas Loob sa Diyos); Ang pagdalaw ng tatlong Mago sa sanggol na si Hesus (Knights of Columbus, Lay Ministers, Daughters of Mary Immaculate); Paglalakbay patungong Ehipto (Botika sa Kanto); Ang pagpatay sa mga sanggol na Hudyo na dalawang taong gulang (Meycauayan College) at ang; Sta. Claus (SPPC Medallion).
“Ipinakikita at itinatampok sa ating mga carroza ngayong taon ang christian values at mapagnilayan ang mga tagpo ng bibliya ayon sa kasalukuyang pangyayari ng ating lipunan,” giit ni Fr. Mercado.
Pinasalamatan ni Fr. Mercado ang bawat pamayanang nakilahok sa christmas carroza na tanda ng pagsasabuhay ng simbahang sinodal lalo’t lahat ng sektor ay kasali sa gawain at buong pusong sinusuportahan ng pamahalaang panlalawigan ng Bulacan.
Kada taon naging tradisyon ang parada ng mga carroza mula Malolos Convention Center patungong kapitolyo ng Bulacan bilang bahagi ng paglunsad sa ‘Pasko ng Bulacan’ sa pangunguna ni Governor Daniel Fernando at mga kasamahang opisyal.
Tinuran ni Fr. Mercado ang kahalagahan ng pagtutulungan ng simbahan at pamahalaan sa paghahanda sa nalalapit na Pasko ng Pagsilang ng Panginoong Hesus na magbibigay liwanag at pag-asa ng mamamayan na pinanghihinaan dulot ng iba’t ibang hamong kinakaharap ng lipunan.
