3,398 total views
Hinimok ng Archdiocese of Manila ang kristiyanong pamayanan na magbuklod sa pananalangin para sa kapayapaan ng mundo.
Ito ang pakikiisa ng arkidiyosesis sa panawagan ng Santo Papa Francisco na ‘day of prayer and fasting’ sa October 27 na layong ipagdasal na mawakasan ang digmaan sa iba’t ibang mga bansa.
“We encourage our communities to organize prayer initiatives for this intention like the Mass for Peace, Adoration of the Blessed Sacrament/Holy Hour, the praying of the holy rosary, or any other celebrations of the Word of God.” bahagi ng pahayag ni Manila Vice Chancellor Carmelo Arada, Jr.
Magbibigay ng liturhiya para sa Eucharistic Adoration for Peace in the Holy Land ang arkidiyosesis na maaring gamitin ng mga parokya at komunidad sa isasagawang pananalangin para sa kapayapaan.
Naunang tiniyak ng Santo Papa Francisco ang pakikiisa at pananalangin sa mga biktima ng digmaan, ang mga nasawi, mga dinukot at lubhang nasugatan na ayon sa datos umabot na sa mahigit 15, 000 katao.
Sa nagpapatuloy na digmaang sumiklab noong October 7 sa pagitan ng Israel at Hamas militant group mahigit 5, 000 na ang nasawi sa magkabilang panig lalo na sa mga Palestinian sa Gaza strip ang sentro ng kaguluhan.
Nanindigan si Pope Francis na kailanman ay hindi matutugunan ng digmaan ang anumang hindi pagkakasundo bagkus ay lalo itong magdulot ng pagkasira at pagkakawatak-watak ng pamayanan.
Nakiusap din ang pinunong pastol kay US President Joe Biden na gumawa ng hakbang upang matulungang maisulong ang kapayapaan sa buong daigdig at matigil ang digmaan sa mga magkatunggaling mga bansa.
Bukod sa Archdiocese of Manila nagpahayag na rin ng pakikiisa ang iba pang arkidiyosesis, diyosesis, at bikaryato tulad ng Lingayen-Dagupan, Malolos, San Carlos – Negros Occidental, Taytay, Palawan gayundin ang Prelatura ng Marawi.
