369 total views
Isang Diocesan Clinic sa Diocese of Alaminos sa Pangasinan ang 22 taon nang tumutulong sa mga mahihirap na may sakit at may karamdaman.
Sa tulong ng Pondo ng Pinoy Community Foundation Inc. mas pinagbuti pa ang serbisyo ng nasabing klinika na nagsimula noong taong 1995 at pinapatakbo sa ilalim ng Social Service Ministry ng diyosesis.
Ayon kay Geraldine Rabarra, Diocesan Coordinator ng Pondo ng Pinoy sa Diocese of Alaminos, malaking tulong ang naibahagi sa kanila ng Pondo ng Pinoy para mas marami pa ang mga mahihirap na maabot ng kanilang klinika.
Prayoridad ng kanilang mga tinutulungan ang mga magsasaka, mga mangingisda at maging mga katutubo na hirap magpagamot at maabot maging ng mga basic health services.
“marami pa din mga patients na kahit basic lang na services hindi nila kaya na talagang mag-pagamot ito ang isa sa mga naging objective ng clinic na magkaroon lahat ng access sa health mayaman o mahirap kasi talagang makita natin sa public [hospitals] yun pila ng patients. Marami talaga nangangailangan ng health services” pahayag ni Rabarra sa panayam ng Programang Caritas in Action sa Radio Veritas.
Nagpapasalamat si Rabarra na maliban sa suporta ng mga institusyon ng Simbahan tulad ng Pondo ng Pinoy ay patuloy din na naglilingkod ng libre ang ilan mga medical practioners sa kanilang lalalawigan.
“bago ang Pondo ng Pinoy meron na kaming mga partners, meron na kaming mga volunteer Doctors tatlo sila na pumupunta dito sa Clinic aside sa mga health partners natin sa labas. Malakas din naman yung ating referral system tapos may volunteers tayo na mga Nurses nakipag-link din tayo sa Pangasinan Medical Society so during sa ating mga outreach programs kasama natin sila” pagmamalaki pa ni Rabarra.
Aminado ang Diocese of Alaminos na naging hamon sa operasyon ng kanilang klinika ang pagkakaroon ng pandemya dulot ng Covid19 ngunit sila ay nagpapasalamat na kanilang naipagpatuloy ang operasyon nito na tumutugon sa pangangailangan ng mga non covid patients.(rowel)
Sa huli nagpasalamat si Rabarra sa mga sumusuporta sa mga programa ng Simbahan para sa mga mahihirap tulad ng Pondo ng Pinoy kung saan ang pondo ay nagmumula mula sa mgab inabahagi mumo o crumbs ng mga mananampalataya sa pamamagitan ng iniipon na bente singko sentimos.
“Yung mga crumbs giver maraming maraming salamat sa pagpapatuloy na bahagi ng inyong crumbs napakalaking tulong po ito sa amin sa Diocese, 21 Parishes po ang natutulungan natin ngayon dahil sa Pondo ng Pinoy. Sana po patuloy tayo magbigay ng ating crumbs at marami pa tayong matulungan.” Pagtatapos ni Rabarra.
Ang Diocese of Alaminos ay isa lamang sa tatlong Diyosesis sa lalawigan ng Pangasinan kung saan kinabibilangan din ito ng Archdiocese of Lingayen-Dagupan at Diocese of Urdaneta.
