765 total views
Ikinalugod ng CBCP-Episcopal Commission on Prison Pastoral Care ang paglalaan ng Kanyang Kabanalan Francisco ng partikular na intensyon sa pananalangin sa buwan ng Setyembre para sa pagbuwag ng parusang kamatayan sa buong daigdig.
Ayon kay Baguio Bishop Victor Bendico, vice chairman ng komisyon higit na napatatag ng mensahe at panalangin ng Santo Papa ang kanilang paninindigan laban sa pagbabalik ng parusang kamatayan sa bansa.
Ibinahagi ng Obispo na higit ding napag-alab ng mensahe ni Pope Francis ang kanilang misyon na protektahan ang kasagraduhan at dignidad ng buhay na biyaya ng Panginoon.
“It strengthens our faith on the value of life and also our faith that we really have to preserve itong binigay sa atin na gift ng Panginoon.” Pahayag ni Bishop Bendico sa panayam sa Radio Veritas.
Tiniyak ni Bishop Bendico na nananatili ang paninindigan ng CBCP-Episcopal Commission on Prison Pastoral Care laban sa planong pagbabalik ng parusang kamatayan sa bansa.
Iginiit ng Obispo na kaisa ng Santo Papa Francisco ang prison ministry ng Simbahang Katolika sa Pilipinas laban sa death penalty na nag-aalis ng pagkakataon sa mga nagkasala na makapagsisi, makapagbalik-loob at makapagbagong buhay.
“Yung CBCP – Episcopal Commission on Prison Pastoral Care reiterate its strong opposition in the move to revive the death penalty in the Philippines at yung isang reason dito ay yung death penalty violates the inherent dignity of a person, which is not lost despite the commission of a crime. Yung stand ng CBCP yung strong opposition ng CBCP sa death penalty in line also with the mind of course of our present Pope.” Dagdag pa ni Bishop Bendico.
Bahagi ng panalangin ng Santo Papa Francisco ngayong buwan ng Setyembre ang pagbuwag ng bawat bansa sa parusang kamatayan na direktang umaatake sa dignidad at buhay ng isang nilalang.
Ayon kay Pope Francis, hindi kailanman magiging katanggap-tanggap ang pagkitil ng buhay ng sinuman.
Sa Pilipinas taong 2006 nang tuluyang pinawalang bisa ni dating Pangulong Gloria Arroyo ang death penalty sa bansa.
Batay sa tala ng Amnesty International, nasa 140 mga bansa na ang nag-abolish o tuluyang nagbuwag sa kanilang parusang kamatayan dahil sa kabiguan nito na tuluyang mapababa ang kriminalidad sa lipunan.
