439 total views
Bukas ang mga simbahan sa Archdiocese of Nueva Segovia sa mga apektado ng pagbaha dulot ng bagyong Maring.
Inihayag Fr. Danilo Martinez, Social Action Director ng Archdiocese of Nueva Segovia at Parish Priest ng Our Lady of Hope Parish sa bayan ng Caoayan, Ilocos Sur na nakipag-ugnayan siya sa kanilang alkalde na maaaring ang simbahan bilang evacuation center ng mga residenteng nagsilikas sa kanilang mga tahanan.
“Nag-aantay din kami ng mga evacuees kasi I asked the Mayor if they need some place for evacuation pwede ang simbahan,” pahayag ni Fr. Martinez sa Radio Veritas.
Kasabay nito, umaapela ng panalangin at pagtulong si Fr. Martinez matapos na maapektuhan ng pagbaha ang malaking bahagi ng Ilocos Sur dahil sa pananalasa ng bagyong Maring.
Ayon kay Fr. Martinez, lubog sa malalim na baha ang ilang mga bayan partikular na ang mga malapit sa dagat habang isang tulay ang nasira at hindi madaanan dahilan upang hindi mapasok ang kanilang lalawigan hanggang sa kasalukuyan.
Sinabi ni Fr. Martinez na sinisikap nilang makipag-ugnayan sa ibang mga simbahan at parokya bagamat apektado din ng bagyo ang kanilang elektrisidad at mga linya ng komunikasyon.
“Lubog sa baha ang karamihan ng mga bayan tapos na-cut din ang national highway dahil sa isang nasirang tulay part ng Sta. Cruz, Ilocos Sur, may malaking river doon kaya not passable siya ngayon papunta ng Manila. Siguro until tomorrow we can do our initial report, almost 24 hours na kaming walang kuryente,” pahayag ni Fr. Martinez sa panayam ng Radyo Veritas.
Tiniyak ni Fr. Martinez na sisikapin ng Arkidiyosesis at ng tanggapan ng Caritas Nueva Segovia na agad makaagapay sa pangangailangan ng mga apektadong residente kaya’t umaapela din sila ng pagtulong mula sa mga mananampalataya.
“Nagre-request na din kami ng mga tulong para makatulong tayo sa mga apektado ng bagyo nabigla ang lahat we didn’t expect na ganito kalakas,” dagdag pa ni Fr. Matinez.
Sa kasalukuyan ay nakalabas na ng Philippine Area of Responsibility ang bagyong Maring ngunit nag-iwan ito ng pinsala sa ilang mga arkdiyosesis at diyosesis sa Northern Luzon partikular na sa Cagayan, Ilocos Sur, Ilocos Norte at Benguet.
Patuloy naman sinisikap ng mga Social Action at Caritas Network sa bahagi ng Simbahang Katolika na magsagawa ng rapid assessment at posibilidad ng agarang pagtulong.
Para sa mga tulong o donasyon sa Archdiocese of Nueva Segovia, maaaring magpadala thru Gcash sa numerong 09175811015 o kaya ay makipag-ugnayan sa tanggapan o Facebook page ng Caritas Nueva Segovia.
